22 vite pritje për të festuar sërish titullin në Angli. Për një klub si Arsenal, dy dekada pritje duken një përjetësi, një klub që në këto 22 vite ka investuar miliona e miliona euro për të shijuar një arritje të tillë. Tifozët, lojtarët, trajneri Arteta të gjithë shpërthyen në festë pas “X” të Man.City përballë Bournemouth, një sukses nga divani, por që pritet të festohet gjatë në rrugët e Londrës. Më në fund, pas 6 vitesh në krye të Arsenal, Mikel Arteta arrin të fitojë titullin e tij të parë, dhe të 14 në historinë e “topçinjve”. Në këto 6 vite, Arsenal i kishin shkuar pranë në më shumë se një herë, në një kohë kur në 5 sezone 3 herë e kishin mbyllur vitin në vendin e dytë.
Pavarësisht se ky titull shkoi me foto-finish, Arsenal nuk “vodhi” asgjë, këtë e konfirmojnë edhe shifrat, e konfirmojnë edhe rivalët, ku i pari që i uroi ishte pikërisht Pep Guardiola. Në një sezon të luftuar fort, diferencën e bëri mbrojtja, me Arsenal që po mbyll sezonin me vetëm 26 gola të pësuar. Kjo është hera e tretë radhazi që Arteta ka mbrojtjen më të mirë në Premier League. Një meritë të veçantë ka edhe portieri Raya ku nga 37 ndeshje, 19 prej tyre i ka mbyllur me portën të paprekur.
Këtë sezon ka pasur kritika të forta në lidhje me mënyrën defensive të lojës, por shifrat vërtetojnë të kundërtën, me 69 gola të shënuar, Arsenal është sulmi i dytë më i mirë në Premier League, vetëm Man.City ka bërë më mirë.
Pas festës se titullit, që pa diskutim pritet të jetë e madhe, tani Arsenal shkon i qetë dhe pa presion në finalen e Champions League ku përballë PSG do të synojnë t’i bëjnë një mbyllje spektakolare këtij sezoni.
