Lot, emocione dhe trofe. CR7 nuk njeh limite, as moshë, vijon të shënojë në mënyrë konstante, por këtë herë edhe të fitojë trofe. Legjenda portugeze bën për vete titullin në Arabinë Saudite, i pari për CR7 që pas largimit nga Evropa. Në sfidën e fundit të sezonit, Al Nassr triumfoi me “poker” golash Damac duke bërë “nul” suksesin e Al Hilal të Inzaghi-t, rivali i tyre kryesor për garën për titull.
Mane dhe Coman realizuan dy golat e parë për Al Nassr, por miqtë rihapën garën me një penallti në minutën e 58-të duke ngushtuar shifrat në 2-1. Stafetën më pas e mori Ronaldo, me portugezin që realizoi një “dopietë” golash. I pari në minutën e 63-të ishte shumë i bukur, me CR7 që ekzekutoi saktë që goditje dënimi. Në minutën e 81-të, Ronaldo përfitoi nga një top i ngecur në zonë duke kompletuar “pokerin” për Al Nassr dhe “dojetën” e tij personale. Me këtë dygolësh, CR7 ngjitet në kuotën e 973 golave në karrierë.
I gjithë stadiumi shpërtheu në festë, ndërsa Ronaldo në lot pasi “dopjeta” e tij hipotekoi titullin e Al Nassr. Me trofeun në duar, Ronaldo festoi gjatë për këtë titull të veçantë në karrierën e tij fantastike.
