Lojtari i Vllaznisë, Elmando Gjini doli në konferencë para ndeshjes ndaj Egnatias.
“Nuk ka ndeshje të lehta në kampionatin tonë. Por si me Egnatian, si me ekipe të tjera, ne gjithmonë shkojmë me një mendim, për të fituar”.
Përsa i përket humbjes me Flamurtarin, 23 vjeçari thekson se ajo është lënë pas dhe tani janë të fokusuar në përballjen e radhës, atë me Egnatian.
“Na erdhi keq për humbjen me Flamurtarin, edhe për faktin se kemi luajtur shumë mirë, mos të themi se i kemi edhe dominuar. Por kështu e ka sporti, duhet vetëm të shikojmë përpara dhe të bëjmë më të mirën”.
Shorti e vendosi Dinamon përballë Vllaznisë në gjysmëfinale të Kupës së Shqipërisë. Por me blutë, shkodranët do të luajnë tri përballje në javën e ardhshme për Kupë dhe kampionat. Gjini thekson se Vllaznia kërkon të dy trofetë, ndaj do të luftojë në të dy frontet.
Tre ndeshje radhazi me Dinamon, në Kupë dhe në kampionat, cila ka rëndësi? Besoj që të dyja, si në Kupë dhe në kampionat. Në kampionat duhet të marrim pikë sa më shumë. Edhe për Kupën duhet të luajmë, duhet të japim maksimumin për të arritur finalen”.
Përsa i përket të ardhmes së tij, Gjini pranon se dëshiron të qëndrojë te Vllaznia.
“Kam kontratë me Ballkanin, por Vllaznia e ka opsionin për të më blerë. Ndihem shumë mirë në Shkodër, jam shkodran, do flas me menaxherin edhe do të shohim se çfarë është më mirë për mua”.
