PS dhe LSI nuk janë më në koalicion qeverisës që prej 25 qershorit të këtij viti. Por në nivel vendor duket se gjërat shkojnë ndryshe. Të paktën në Bashkinë Gjirokastër, e cila drejtohet prej LSI-së. Këshilli Bashkiak ka miratuar sot me shumicë votash Paketën Fiskale të vitit 2018. Shumica e votave u krijua prej këshillarëve të LSI-së dhe PS-së, ndërsa këshilltarët e PD-së votuan kundër. Kalimi i Paketës Fiskale është sinjal se PS e LSI do të merren vesh edhe për miratimin e buxhetit të vitit të ardhshëm.
Por mbërritja te konsensusi në mbledhjen e sotme, nuk ka qenë e lehtë. Burime të ArgjiroLajm.net thonë se kryebashkiakja Zamira Rami ka zhvilluar paraprakisht takime me këshilltarë e drejtues të PS-së, për të gjetur dakordësinë në Këshillin Bashkiak.
Për momentin nuk dihet se çfarë i bashkoi të dy palët. Zor të mendohet se ka qenë interesi publik, siç thuhet shpesh në kësi rastesh, por me siguri që secila anë ka bërë lëshimet apo ‘shantazhet’ e veta. Mbetet për t’u parë sesa do qëndrojë ky konsensus deri në kalimin e buxhetit.
©ArgjiroLajm.net
