Vriten 40 palestinezë në Gaza teksa Trump e Netanyahu bisedojnë për armëpushim

Të paktën 40 palestinezë humbën jetën në sulmet ajrore izraelite në Rripin e Gazës, njoftuan sot zyrtarët e spitalit Nasser në qytetin jugor Khan Younis.
Mes viktimave janë 17 gra dhe 10 fëmijë. Një sulm me bombë vrau 10 persona nga e njëjta familje, përfshirë tre fëmijë.
Ndërkohë, kryeministri i Izraelit, Benjamin Netanyahu, zhvilloi një takim të dytë brenda dy ditësh me presidentin amerikan, Donald Trump, në Shtëpinë e Bardhë në Uashington, mbrëmjen e së martës.
Trump po bën përpjekje për të ndërmjetësuar një armëpushim që mund të çojë në përfundimin e luftës 21-mujore në Gaza.
Izraeli dhe Hamasi po shqyrtojnë një propozim të ri për armëpushim të mbështetur nga SHBA-ja, i cili do të ndalonte luftën dhe do të lironte pengjet izrealite dhe do të dërgonte ndihma shumë të nevojshme në Gaza.
Ushtria izraelite nuk komentoi për sulmet specifike, por deklaroi se ka goditur mbi 100 objektiva në të gjithë Gazën gjatë ditës së kaluar, duke përfshirë militantë, struktura me kurthe shpërthyese, depo armësh, lançues raketash dhe tunele.
Izraeli akuzon Hamasin për fshehjen e armëve dhe zhvillimin e luftimeve midis civilëve.