Drejtoria e Inspektimit Financiar në Ministrinë e Financave ka nxjerr një urdhër pas përfundimit të inspektimit të Ndërmarrjes së Trajtimit të Studentëve në Gjirokastër, ku ndër të tjera është evidentuar një abuzim financiar në vlerën e rreth 25 milionë lekëve të vjetra nga ish-drejtuesi i këtij institucioni, Nikolla Buka. Sipas raportit, një pjesë të së cilit e shihni më poshtë, Nikolla Buka dhe tre nëpunës të tjerë të kësaj ndërmarrje kanë shpërdoruar paratë për naftë, pa provuar me dokumente ligjore pse dhe si është përdorur kjo sasi karburanti.
Ministria e Financave kërkon nga ish-drejtori Nikolla Buka, ish shefja e Financës, Silva Rapi dhe ish arkëtarja Irena Koçi, t’i kthejnë shtetit shumën e rreth 25 milionë lekëve dëm financiar. Por abuzimi i njerëzve të LSI-së, punësuar prej Vangjel Tavos në Ndërmarrjen e Trajtimit Studentor në Gjirokastër, nuk ndalet me kaq. Sipas raportit nuk provohet me asnjë dokument ligjor as riparimi i automjetit ‘Toyota RAV 4’. Vlera e dëmit përllogaritet në rreth 10 milionë lekë të vjetra. Pra, në total janë rreth 35 milionë lekë të vjetra që nuk dihet se ku përfunduan, ndonëse s’është e vështirë të merret me mend. Pak javë më parë drejtoresha aktuale e kësaj ndërmarrje, Doriana Demo, denoncoi në Facebook paraardhësin e saj edhe për abuzimin me një tender për dyshekët e studentëve. Ajo madje paralajmëroi që do të bënte kallëzim në Prokurorinë e Gjirokastrës.
Nuk dihet nëse i ka shkuar deri në fund këtij zotimi, por edhe sikur Doriana Demo të ketë ndryshuar mendje rrugës, raporti i Drejtorisë së Inspektimit Financiar në Ministrinë e Financave, mjafton që Prokuroria e Gjirokastrës të fillojë një hetim për abuzimet me fondet publike në Ndërmarrjen e Trajtimit Studentor. Nuk është as çudi që kjo çështje të kalohet në heshtje, të bëhet sikur nuk ka ndodhur asgjë. Mbetet për t’u parë edhe nëse Nikolla Buka, Silva Rapi dhe Irena Koçi, do t’i kthejnë shtetit shumën prej 35 milionë lekë dëm financiar apo historia do të fashitet si shumë skandale të tjera që ka parë ky vend.
© ArgjiroLajm.net
