Pas 13 palë zgjedhje pluraliste, për herë të parë në 30 Qershor, shqiptarët nuk u ftuan të votonin një palë ose një tjetër, por u sfiduan nga të dy kampet politike me thirrje për pjesëmarrje, ose bojkot. Por a shkuan të gjithë shqiptarët tek kutia e votimit për të zgjedhur, apo edhe për të dhënë një mesazh?
Një e dhënë për t’u marrë në konsideratë për këtë pyetje është numri i votave të pavlefshme. Në zgjedhjet lokale të vitit 2015, 2.39% e votave ishin të pavlefshme. Qytetarët ose kishin vendosur gabim shenjën jashtë kutisë së votimit, ose me qëllim kishin bërë më shumë se një shenjë, apo kishin lënë shënime mbi fletë.
Ndërkohë në zgjedhjet e 30 qershorit numri i votave të pavlefshme është shumë më i madh. Përllogaritet në rreth 48 mijë vota sipas KQZ-së. Në Bashkinë Gjirokastër totali i votave të pavlefshme është 660 ose rreth 6% e votave ishin të pavlefshme. Natyrisht që nuk kemi të bëjmë me pakujdesi nga zgjedhësit, por me qëllim pjesa më e madhe e kanë prishur votën e tyre.
Në Gjirokastër ata që kanë e nxjerr votën të pavlefshme janë sidomos mbështetës të LSI-së dhe PD-së që punojnë në administratën e Bashkisë Gjirokastër dhe dhe institucione të tjera publike. Të ndier ndoshta nën presion nga eprorët e tyre ose edhe për forcë zakoni sic jemi mësuar të shohim në Shqipëri, ata kanë shkuar në votime pa dëshirën e tyre dhe në mënyrë të qëllimtë e kanë prishur votën. Me siguri shumë nga ata punonjës të Bashkisë Gjirokastër të angazhuar me LSI-në, që i kanë premtuar Flamur Golemit mbështetje me votë, si formë për ‘ta mbajtur mirë’ me kryetarin e ardhshëm, duhet të kenë vepruar ndryshe në kutinë e votimit.
Mesazhet në vota ishin nga më të ndryshmet. Që nga sharjet, etiketimet, pikturat etj me radhë. Kështu që gjithë votat e pavlefshme, përjashto shumë pak për gabime njerëzore, duhen kërkuar në radhët e mbështetësve të LSI-së dhe PD-së. Rama ka kërkuar një analizë për 30 qershorin, ku një prej komponentëve që do të shqyrtohet janë edhe votat e pavlefshme.
©argjiroja.net
