Zbardhen të tjera detaje nga hetimet e Prokurorisë së Krimeve të Rënda lidhur me hetimit e grupit që trafikoi 2.5 ton kanabis nga porti i Durrësit. Kanabisi ishte zhvendosur drejt Durrësit me dy kamionë të rëndë, teksa vetëm njëri prej tyre kreu kontrollin në skaner në Portin e Durrësit. Drejtuesi i njërit prej kamionëve është Dhimo Koraj, banues në Gjirokastër, i cili tashmë është arrestuar nga policia.
Sipas hetimeve, drejtuesi i kamionit Dhimo Koraj, ndërroi targat e rimorkios së pakontrolluar duke i vendosur ato të mjetit të kaluar më herët në skaner. E gjithë skena ishte monitoruar nga kamerat e sigurisë duke u përdorur nga prokurorët si prova materiale. 2.5 tonë kanabis që u kapën nga autoritetet në brigjet e Ankonës ishin fshehur në kamion që trasportonte dru. Pas arrestimeve të së mërkurës, shkon në 12 numri i personave të vënë në pranga për këtë rast ndërkombëtar të trafikut të lëndëve narkotike. Prokuroria thotë se organizatori i këtij rrjeti të trafikut ishte shtetasi Festim Lelaj, nënkomisar në Policinë e Fierit.
©ArgjiroLajm.net