Saranda mirëpriti sot atë që konsiderohet si jahti më i madh në botë, ‘Sailing Yacht A’. Nuk dihet se kush ka qenë brenda këtij jahti dhe nëse vizitorët do të qëndrojnë në Sarandë, por nga verifikimet në internet rezulton se ky mjet lundrues është në pronësi të Andrey Melnichenko, një prej miliarderëve rusë më të mëdhenj.
Melnichenko figuron si njeriu i shtatë më i pasur në Rusi, me 16.2 miliardë dollarë. Ndërsa prestigjozja ‘Forbes’ e rendit në vendin e 88-të në botë. Ai është aksioneri kryesor në një kompani të produkteve të fertilizimit, si dhe në shumë biznese të tjera. Në Rusi konsiderohet si një nga filantropët më të mëdhenj. Jahti i tij luksos që mbërriti në Sarandë do të furnizohej me rreth 850 mijë litra nafte.
Një numër i madh autobotesh qëndronin në radhë për furnizimin e mjetit lundrues. ‘Sailing Yacht A’ është prodhuar në vitin 2017 dhe ka një gjatësi prej afro 143 metër, ndërsa vlera e tij është 500 milionë dollarë. Po ashtu thuhet se jahti është 91 metër i lartë. Ankorimi i tij në Sarandë tërhoqi vëmendjen e pushuesve.
© ArgjiroLajm.net
