Tepelena është mes bashkive ku do të zhvillohen zgjedhje të pjesshme për shkak se kryetarët që ishin në detyrë u zgjodhën tashmë deputetë të legjislaturës së re të Kuvendit në 11 maj.
Ndonëse deri më tani zgjedhjet e reja lokale nuk janë dekretuar ende nga presidenti Bajram Begaj, gjasat janë që ato të zhvillohen në vjeshtë, në periudhën zgjedhore 15 tetor deri më 15 nëntor.
Prej vitit 2011 Tepelena drejtohej nga Tërmet Peçi, i zgjedhur si përfaqësues i Partisë Socialiste. Kjo e fundit nuk e ka ende një kandidat me të cilin do të garojë në zgjedhjet e vjeshtës.
Emra të ndryshëm kanë nisur të përfliten mes strukturave lokale të PS-së në Tepelenë, por zyrtarizmi i kandidatit do të marrë kohë. Një variant shumë i mundshëm për socialistët është të shkojnë në këto zgjedhje me një grua.
Më e paqartë është situata në radhët e opozitës, e cila pavarësisht kandidatit do ta ketë shumë të vështirë të fitojë Tepelenën, që njihet si bastion i Partisë Socialiste. Sidoqoftë koha ka treguar në jo pak raste se edhe bastionet mund të bien.
Dy vite më parë Partia Demokratike e fitoi Bashkinë Memaliaj me një kandidat që kishte më shumë avantazhe se ai i Partisë Socialiste.
Me zyrtarizimin nga kreu i shtetit të datës së zgjedhjeve të pjesshme lokale në bashkitë ku ka vakanca në drejtim, do të kemi edhe emrat e kandidatëve që do t’i prijnë garës në Tepelenë, Berat dhe Mat.
Pezull është gjithashtu edhe Tirana dhe deri më tani mbetet e papaërcaktuar nëse kryeqendra e vendit do të shkojë në zgjedhje të parakohshme, për pasuesin e Erion Veliajt, kryebashkiakut në detyrë që prej më shumë se 4 muajsh është i arrestuar dhe ndodhet në burg. ©Argjiroja.net
