Ministri i Brendshëm Ervin Hoxha ka folur nga Gjirokastra, ku mori pjesë në një mbledhje me të gjithë Prefektët e Qarkut, në të cilën u diskutua për masat e marra për procesin zgjedhor të 11 majit dhe detaje që kanë të bëjnë me përgjegjësitë e strukturave të përfshira në këtë proces. Pas mbledhjes, Ministri Hoxha ka bërë një prononcim për gazetarët:
Ministri Hoxha: Sot në vijim të takimeve që neve kemi periodikisht me Prefektët e Qarkut, kemi bërë një takim në Gjirokastër ku kemi biseduar për të gjitha masat e marra dhe koordinimin për përgatitjen dhe ngritjen e infrastrukturës për zgjedhjet e 11 majit. Kemi diskutuar në detaje të gjitha përgjegjësitë që Prefektët e Qarqeve duhet të marrin në zbatim të ligjit si dhe kodit zgjedhor. Aktualisht janë hartuar të gjithë planet e masave. Prefektët e qarqeve në bashkëpunim me bashkitë, Policinë e Shtetit do të jenë në gjendje për të ngritur infrastrukturën dhe planifikuar në mënyrë të rregullt zgjedhjet e 11 majit 2025. Aktualisht kemi rreth 100 mijë shtetas shqiptarë të cilët janë regjistruar në platformën e KQZ për zgjedhjet e 11 majit.
Pyetje: Një problematikë e këtyre ditëve ka qenë edhe vota e diasporës…?
Ministri Hoxha: Për sa i përket votës së diasporës, qeveria shqiptare miratoi p/vendimin ditën e mërkurë (të shkuar), ku të gjithë shtetasve shqiptarë të cilëve u kishte përfunduar vlefshmëria e kartave të identitetit dhe pasaportave biometrike, do të kenë mundësi të votojnë për zgjedhjet e 11 majit. Kjo vlefshmëri është zgjatur deri në datën 31 maj 2025.
