Zhvendoset Gjykata e Apelit, zgjidhje e përkohshme për Dhomën Civile

“Godina përballë parlamentit, ngjitur me Komunitetin Mysliman, do të jetë shtëpia e re e Gjykatës së Përgjithshme të Apelit. Jo shumë larg godinës ekzistuese, në mars, Qeveria i kaloi në administrim Këshillit të Lartë Gjyqësor ambientet e drejtorisë së tatimpaguesve të mëdhenj pasi KLGJ kishte hapur një thirrje dhe kërkonte godinë me qira për Apelin e vetëm”, raporton gazetarja e Tv Klan, Bleona Metushi.
E parë si një zgjidhje e përkohshme, pas restaurimit, në këtë godinë do të vendoset Dhoma Civile e Gjykatës së Përgjithshme të Apelit dhe aty do të zhvillohet çdo gjyq me karakter civil.
Me shkrirjen e 13 apeleve në 1 shkurt të 2023 në një të vetëm atë të Tiranës, godina ekzituese nuk kishte kapacitetet për të akomoduar trupën e gjyqtarëve dhe stafin administrativ duke u kthyer në një problem.
Edhe pse aktualisht në Shkallën e Dytë ushtrojnë detyrën 26 gjyqtarë, organika e plotë e Apelit të vetëm parashikon një numër total prej 78 gjyqtarësh, si dhe 32 ndihmës ligjor.
Në Gjykatën e Përgjithshme të Apelit problem nuk janë vetëm ambientet për akomodimin e gjyqtarëve dhe punonjësve, por edhe ato për sistemimin e dosjeve.
Ajo po përballet prej vitesh me një stok të madh dosjesh, që në 2024 u përmbyll me 41,700 çështje të prapambetura.
Teksa godina e re shihet si një hap drejt lehtësimit të ngarkesës, ajo nuk është një zgjidhje përfundimtare.
Reforma në drejtësi ka ngritur nevojën për ambiente, për burime njerëzore dhe digjitalizim.
Deri në përmbushjen e tyre, sistemi do të vazhdojë të ecë në kushte të përkohshme.