Dy vëllezër sirianë mbytën motrën e tyre 18-vjeçare në një kënetë, një vrasje për nder, e urdhëruar nga babai i tyre, pasi ai zbuloi se vajza e tij kishte një të dashur. Krimi i tmerrshëm ndodhi në Holandë dhe dy vëllezër u nxorën në gjyq pasi babai i tyre iku në Siri.
18-vjeçarja Rayan Al-Jayar u vra nga vëllezërit e saj me urdhër të babait të saj, sepse ajo kishte “turpëruar” familjen duke pasur një partner. Babai Khaled, i cili u largua në Siri, do të gjykohet në mungesë ndërsa vëllezërit, Mohammed, 23 vjeç, dhe Muhannad, 25 vjeç, u nxorën në bankën e të akuzuarve.
18-vjeçarja u zhduk nga shtëpia e familjes së saj në Jura të Holandës, më 22 maj 2024. Gjashtë ditë më vonë, ajo u gjet e vdekur në një kënetë në Lelystad, ku ekspertët mjeko-ligjorë zbuluan se asaj i ishte mbyllur goja, duart i kishte të lidhura pas shpine dhe kyçet e këmbëve të bllokuara me shirit ngjitës. Ekspertët mjeko-ligjorë gjetën në thonjtë e saj ADN-në që i përkiste babait të saj, duke sugjeruar se ajo kishte rezistuar.
Ata i mohojnë akuzat
Prokurorët thonë se 18-vjeçarja u vra sepse kishte të dashur dhe u soll në një mënyrë që familja e saj e konsideronte “perëndimore” duke e regjistruar atë si një krim nderi. Vëllezërit e saj, gjyqi i të cilëve filloi të enjten, këmbëngulin se vrasja është kryer nga babai i tyre.
Babai që iku në Siri thuhet se i dërgoi dy email-e gazetës holandeze “De Telegraaf” duke marrë përgjegjësinë e plotë dhe duke i deklaruar djemtë e tij të pafajshëm. Megjithatë, prokurorët e hodhën poshtë pretendimin e tij, duke këmbëngulur se ai vetë i urdhëroi djemtë e tij të rrëmbenin dhe të vrisnin Ryanin.
Vlen të përmendet se 18-vjeçarja ishte nën mbrojtje policore, e cila iu ndërpre para vrasjes së saj, pa sqaruar arsyet që i çuan autoritetet në këtë vendim.
Babai në Siri
Media holandeze “Nieuwsuur” raportoi se Khaled është fshehur në Sirinë veriore dhe është rimartuar. Ministria holandeze e Drejtësisë thotë se nuk ka asnjë mënyrë për ta sjellë atë përsëri, duke shpjeguar: “Aktualisht nuk ka mundësi për bashkëpunim kriminal me Sirinë, pasi autoritetet penale që duhen për një bashkëpunim të tillë nuk janë (ende) funksionale në atë vend”.
Megjithatë, Ministri sirian i Drejtësisë Mazhar al-Wais thotë se gjykatat e vendit janë “rivendosur plotësisht”, duke shtuar: “Ato do të ofrojnë ndihmën e nevojshme ligjore në përputhje me rregulloret”. Ai pretendon se Siria tashmë ka trajtuar 3 kërkesa nga vendet evropiane, por nuk ka marrë asnjë nga Holanda për rastin e Ryan. Avokatët e vëllezërve kanë kërkuar lirimin e tyre para gjyqit, por gjykatësi ka urdhëruar që ata të qëndrojnë në burg.
