Anëtari i Këshillit Kombëtar të PD-së Roland Bejko, në fjalimin e mbajtur dje në Kuvendin Kombëtar të PD tha se Sali Berisha u mbylli dyert themeluesve sepse ka një mendësi puniste, ku e do historinë për vete. Ndër të tjera Bejko solli në vëmendje shembullin e Azem Hajdarit, duke u shprehur se ai u përzu nga partia që krijoi vetë.
“Kështu ndodhi me Azem Hajdarin, ishte themeluesi i PD, studenti që udhëhoqi lëvizjen e dhjetorit. çfarë ndodhi me Azem Hajdarin? Ne jemi dëshmitarë se si ne e përzumë nga PD, nga partia që krijoi vetë. I janë mbyllur dyert dhe e katandisëm në atë derexhe sa për të hyrë në PD iu desh të përplasej me rojen, që i thoshte t’i nuk je më pjesë e PD-së. Kështu ka ndodhur me të gjitha figurat e larta të PD, po përmend Azemin si më tipikun. Sot më vjen keq kur shikoj ish-studentë të dhjetorit që janë kthyer në hije të vetvetes, se i ktheu ai burri, i ktheu Sali Berisha.
I ktheu Berisha sepse na përdori të gjithëve kur i duheshim, por kur duheshim ne të jepnim kontribute në nivele të larta politike të partisë na mbylleshin dyert sepse ishim pjesa e historisë, dhe historia duhej e gjitha për vete. Ky ishte kulti i individit, ky ishte punizmi. Përshëndes çdo vendim të PD për ndarje nga e shkuara. Ne nuk duhet të ndahemi me individë që janë të mirëseardhur. Dhe më vjen mirë që këtu nuk është thënë të përjashtohet Sali Berisha. Sepse ai ka kontributet e veta, siç ka dritë-hijet e forta. Sali Berisha nuk mundi të ngrihet mbi te vërtetën. Nuk bëri atë që i kërkuam kur u shpall non grata, ta shikonte me gjakftohtësi. Të pranonte që ka qarkullim elitash, ka edhe një fund politik, që mund të vijë për shumë arsye. Ka shumë burra shteti në botë që janë larguar nga politika që kanë gabuar vetëm një herë. Ne pritëm që z.Berisha të ishte vetvetja, por pas datës 9 kuptova që punizmi është shumë i vështirë të dalë nga njeriu, që ashtu si vesi del me shpirtin”, tha Bejko.
