Ato kanë krijuar një grup polifonik bilingual. Janë minoritare greke që kanë lindur në Shqipëri dhe jetojnë në Athinë. Kanë krijuar Grupin polifonik të vajzave “Isokratisses”. Janë nga Pogoni dhe jetojnë në Athinë. Kanë profesione të ndryshme dhe nuk kanë asnjërën udhëheqëse të grupit. Dëshirën, pasionin dhe veçanërisht talentin për polifoninë e kanë të ruajtur dhe trashëguar prej prindërve të tyre minoritarë. Qytetarë shqiptarë të kombësisë greke nga Poliçani dhe Dropulli.
Artemis, dhe motra e saj Sofia, Maria, Liliana dhe tri gocat e tjera, të cilave nuk ua morëm dot emrat, ndajnë punë dhe profesione të ndryshme në Athinë. Por në kohën e lirë gjejnë njera-tjetrën dhe ushtrojnë këngën polifonike si në greqisht ashtu edhe në shqip. Kanë fituar mundësinë të përfaqësohen në natën e shtatë të FFK së Gjirokastrës, në datën 30 qershor 2023, si pjesë e ansamblit të Qarkut të Gjirokastrës.
Kanë zgjedhur kostumin lunxhiot për skenën e kalasë, si dhe kanë një këngë lirike në greqisht. Por në momente të ndryshme të ditëve të festivalit preferojnë të këndojnë në shqip, këngën emblematike ” Zogë e Libohovës”, e cila tërheq maksimalisht vëmendjen e festivalistëve dhe turistëve, të të ardhurve në Qafën e Pazarit dhe sokakët e qytetit magjik.
Gjirokastra në këto ditë ka madhështinë e shpirtit real të saj për të eklipsuar me fuqinë e artit popullor shqiptar, gjuhë dhe talente të ardhur nga etni dhe popuj të tjerë.
