Koço Kokëdhima tregon arsyet se pse krijoi një parti të re pas largimit nga Partia Socialiste.
Në emisionin “Studio e hapur” me gazetaren Eni Vasili në studion e “News24”, Kokëdhima thotë se ishin kryetari i PS, Edi Rama, dhe Gramoz Ruçi, dy personat që e nxorën atë jashtë partisë. Ai thotë se ky largim, u bë pa asnjë vendim dhe pa procesverbal.
Kokëdhima thotë se largimi i tij nga PS ndodhi për shkak se “aty nuk pranohej mendimi ndryshe”.
Nisur nga kjo situatë, Kokëdhima thotë se krijoi lëvizjen “Zgjidhja”, dhe shton se me këtë parti të re do të hyjë në zgjedhjet e ardhshme, të lira e të ndershme, me synimin për t’i fituar ato.
“Edi Rama dhe Gramoz Ruçi na nxorën jashtë partisë. Në asamblenë e Partisë më shkarkuan nga gjithë funksionet pa asnjë vendim, pa asnjë procesverbal. Ata nuk e pranonin dot as mendimin ndryshe, dhe as reagimin brenda partisë. Dhe këtë nuk e bënë vetëm me mua. Sa anëtarë të PS larguan nga asambleja, sa të tjerë pushuan nga puna. Pse? Sepse këta mendonin ndryshe. Ne kërkonim që të pranohej platforma jonë në parti, dhe të debatohej. Por ata na larguan”, tha Kokëdhima.
