Kreu i dhomës së tregtisë dhe industrisë në Tiranë, Nikolin Jaka, i cili në detyrë ka si qëllim të mbrojë bizneset, është shprehur hapur që të mbyllen 138 mijë biznese të vogla dhe vetëm e vetëm për të përfituar bizneset e mëdha.
Ky zotëri shprehet në “Top Show”, ku u diskutua për barrën e TVSH për bizneset e vogla, se i gjithë informaliteti lind nga aty dhe vendosja e TVSH për këto biznese është zgjidhja e duhur që ato të mbyllen.
“Dyqanet e lagjeve duhet të mbyllen dhe do të mbyllen brenda 4-5 viteve. Qytetarët duhet të shkojnë të blejnë në supermarkete”, tha Jaka.
Por, aktualisht janë të regjistruara 138 mijë biznese të vogla, të cilat mbajnë me bukë më e pakta 2 persona për familje. Domethënë gati 300 mijë persona hidhen në rrugë të madhe gjithçka shkon drejt monopolit.
Por ky zotëri duket se e ka gjetur një zgjidhje.
“Këta pronarë të dyqaneve të lagjes, janë ekonomistë, berberë, këpucarë apo orëndreqës të cilët shumë mirë mund të punojnë në profesionin e tyre”, thotë Jaka.
Por ku e di ai që këta persona e kanë një profesion? Nëse dikush do të ishte ekonomist, me çfarë logjike ai do të kishte hapur një dyqan lagjeje dhe do të mbahej me të ardhurat e tij dhe nuk do të punonte në profesion.
Mendimet e Jakës u kundërshtuan fuqishëm nga përfaqësuesi i biznesit të vogël, i cili tha se e gjitha po bëhet për të mbyllur bizneset e vogla dhe të krijohet monopoli.
