Një i ri është gjetur i pajetë në Vlorë këtë të mërkurë, në një ndërtesë të braktisur. Dyshimet e policisë janë se i riu ka gjetur vdekjen nga një mbidozë heroine.
Dyshimet
Salla Operative e Policisë së Vlorës është njoftuar nga një telefonatë se në lagjen “4 Heronjtë”, në një godinë të braktisur ndodhet një person i pajetë.
Shërbimet e Policisë dhe Grupi hetimor kanë shkuar pranë vendit të ngjarjes dhe kanë konstatuar se në një godinë të braktisur ndodhej i shtrirë dhe i pajetë E.D., 23 vjeç.
Dyshohet që viktima të ketë konsumuar lëndë narkotike (heroinë) pasi nga këqyrja paraprake e kufomës, është konstatuar në pjesën e barkut një shiringë.
Denoncimi “i zhdukur”
Për 23-vjeçarin, familjarët ditën e sotme kanë njoftuar në Polici se ai është larguar nga banesa, bëjnë me dije burime policore.
Trupi është transportuar në morgun e spitalit Vlorë për të kryer ekspertizën mjeko- ligjore, për të përcaktuar shkakun e saktë të humbjes së jetës.
Ndërkaq, grupi hetimor po punon për zbardhjen e plotë të rrethanave të ngjarjes.
