POLICIA E SHTETIT
Policia e Gjirokastrës ka finalizuar me sukses operacionin e koduar “Masa”, duke goditur një rast të transportimit të emigrantëve nga vendet e treta, me qëllim kalimin e paligjshëm të kufirit.
Operacioni u zhvillua nga Seksioni për Hetimin e Trafiqeve të Paligjshme, në bashkëpunim me Sektorin Operacional, pas sigurimit të informacioneve në rrugë operative. Gjatë ndërhyrjes, në aksin rrugor Gjirokastër–Tepelenë, shërbimet e Policisë ndaluan dy automjete që drejtoheshin nga shtetasit A. O. dhe A. M.
Gjatë kontrollit në automjete, u gjetën dhe sekuestruan 2 radio marrëse të ngjashme me ato që përdor Policia, si dhe 1 palë targa, të dyshuara se përdoreshin për të lehtësuar aktivitetin e paligjshëm.
Nga verifikimet rezultoi se dy të ndaluarit kishin thyer masën e sigurisë “arrest në shtëpi”, të vendosur më herët për veprën penale “Ndihma për kalim të paligjshëm të kufijve”. Konkretisht, masa ishte caktuar nga Gjykata e Sarandës për 42-vjeçarin dhe nga Gjykata e Shkodrës për 29-vjeçarin.
Në përfundim të veprimeve, u bë arrestimi në flagrancë i shtetasve A. O. alias A. P., 42 vjeç, banues në Sarandë dhe A. M., 29 vjeç, banues në Shkodër.
Policia bën me dije se hetimet vijojnë për të dokumentuar plotësisht veprimtarinë e tyre kriminale dhe për të identifikuar persona të tjerë të përfshirë në këtë aktivitet.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme.
