Një ditë pas denoncimit të Report Tv për ndotjen mjedisore në Parkun Kombëtar të Vjosës nga kompania e naftës ‘Albpetrol, policia ka nisur hetimet për 4 punonjës me dyshimet se neglizhenca e tyre ka sjellë çarjen e një tubacioni nafte e për pasojë ndotjen e përroit të Gorishovës, i cili derdhet në lumin Vjosa.
Sipas Policisë së Fierit, materialet u referuan në prokurori, ku nisi hetimi në gjendje të lirë ndaj Zylfo Tabakajt 59 vjec, Aleksandër Zenelit 57-vjec, Gramoz Bregajt 52-vjec dhe Genci Numanajt 52-vjec. Dy prej tyre jane pergjegjes ne kompani, ndërsa dy të tjerët janë punonjës terreni.
Hetimet paraprake tregojnë se ata nuk kanë marrë masa ne kohe për mirëmbajtjen dhe riparimin e një linje të amortizuar që transporton naftën nga zona naftëmbajtëse e Drenovës drejt qendrës së grumbullimit.
“Specialistët e Seksionit për Hetimin e Krimeve Ekonomike të DVP Fier referuan materialet në Prokurori, ku nisi procedimi penal ndaj shtetasve Z. T., 59 vjeç, A. Z., 57 vjeç, G. B., 52 vjeç dhe G. N., 52 vjeç, punonjës të një kompanie për nxjerrjen e naftës. Këta shtetas dyshohet se nuk kanë marrë masat e nevojshme për riparimin e një linje të dëmtuar të tubacionit të nxjerrjes së naftës, duke shkaktuar ndotje të mjedisit dhe lumit Vjosa”, informoi policia.
Çarja e tubacionit ka shkaktuar rrjedhje hidrokarburesh, të cilat kanë përfunduar në përroin e Gorishovës në njësinë administrative Cakran të Fierit, duke u përhapur më tej në zonë dhe duke arritur deri në Vjosë, i cili është Park Kombëtar.
Në zonën naftëmbajtëse të Drenovës ndodhen rreth 20 puse active nafte. Duhet theksuar se “Albpetrol” punon me teknologji të vjetëruar dhe shpesh ka shkaktuar ndotje të tokës dhe ujit. Banorët e zonës thanë nje ditë më parë për Report Tv se shkarkimet kanë bërë dëme në kulturat bujqësore.
Aksioni Albetrol për riparimin e defektit dhe vendosjen e pritave në përroin e Gorishovës, në zonën e Selishtës nisi te premten, kur kishin kaluar 5 ditë nga shkarkimet masive të hidrokarbureve që sollën ndotjen katastrofike./ Report Tv
