Ministrja e Arsimit Mirela Kumbaro, nga Komisioni për Edukimin, Shkencën e Sportet prezantoi projektligjin për reformimin e Qendrës së Shërbimeve Arsimore në Agjencinë Kombëtare të Shërbimeve Arsimore me qëllim modernizimin e ofrimit të shërbimeve arsimore në vend dhe sigurimin e aksesit publik në fushën e arsimit të lartë dhe arsimit parauniversitar, si dhe çdo shërbim tjetër të caktuar sipas legjislacionit në fuqi.
“Reformimi i Qendrës së Shërbimeve Arsimore ka për qëllim ofrimin e shërbimeve dhe sigurimin e aksesit publik në fushën e arsimit të lartë dhe arsimit parauniversitar, si dhe çdo shërbim tjetër të caktuar sipas legjislacionit në fuqi, nëpërmjet përmirësimit të formës së saj të organizimit institucional, bazuar në rritjen e cilësisë së funksionimit. Po flasim për një institucion që ofron rreth 158 mijë shërbime në vit. Janë shërbime shumë sensitive, me afate kohore, ndonjëherë edhe jetike për qytetarët, siç mund të jetë njehsimi i diplomës ndërkombëtare, pasi ka efekt direkt në punësim, apo në vijimin e studimeve në Shqipëri. Dhe të gjitha këto kryhen në kushte jo optimale, për shkak të kapaciteteve të kufizuara teknologjike, logjistike dhe njerëzore”, sqaroi ministrja Kumbaro.
Gjatë argumentimit të projektligjit, ministrja Kumbaro u ndal edhe te bashkëpunimi me ekspertizën e Cambrige në ndërtimi ne një sistemi të modernizuar të vlerësimeve në vendin tonë.
“Gjetjet e raportit të Kembrixhit theksojnë nevojën urgjente për rritjen e cilësisë, besueshmërisë dhe modernizimit të sistemit të vlerësimit në Shqipëri. Së bashku me ekspertët e Kembrixhit, kemi rënë dakord për të ndërtuar një sistem më modern, më të drejtë dhe më transparent, i cili i përgjigjet standardeve ndërkombëtare dhe nevojave të arsimit në vend”, vijoi ministrja.
Nga ana tjetër, Kumbaro theksoi ky projektakt është pjesë e programit të përgjithshëm analitik të projektakteve për Ministrinë e Arsimit për t’u miratuar në vitin 2026, me të cilin plotësohen pikat e Kapitullit 26 për anëtarësimin në Bashkimin Europian:
“Duhet thënë gjithashtu, se me miratimin e këtij ligji, plotësohen edhe të gjitha piketat e Kapitullit 26 të anëtarësimit në Bashkimin Europian, duke e bërë kapitullin e parë që Shqipëria përmbyll në këtë process, dhe sigurisht mendoj se është një moment pozitiv patjetër për Ministrinë e Arsimit, por edhe për ju të nderuar deputetë, si pjesë e Komisionit për Edukimin.”
Sipas projektligjit, forma e organizimit të institucionit që do të ofrojë shërbimet arsimore nuk prek autonominë e institucioneve të arsimit të lartë të parashikuar në nenin 57 të Kushtetutës.
“Veprimtaria e Agjencisë Kombëtare të Shërbimeve Arsimore do të mbikëqyret nga ministria përgjegjëse për arsimin, e cila do të ketë për detyrë të verifikojë zbatimin korrekt të politikave dhe strategjive kombëtare në fushën e arsimit.
Për qëllim mbikëqyrjeje dhe kontrolli, Agjencia do të ketë për detyrim të dorëzojë raportin vjetor mbi veprimtarinë e saj pranë ministrit përgjegjës për arsimin, brenda datës 31 mars të çdo viti pasardhës”, u shpreh Kumbaro në lidhje me formën e organizimit të agjencisë.
Në projektligjin për krijimin e Agjencisë Kombëtare të Shërbimeve Arsimore, sipas ligjit për agjencitë autonome, parashikohet drejtimi nga një bord i cili është një ndër instrumentet me të cilët administrohen agjencitë autonome.
Bordi do të drejtohet nga ministri përgjegjës për arsimin dhe të gjitha vendimet e bordit, ato më të rëndësishme, që kanë të bëjnë me buxhetin apo pagat, do të kalojnë dhe në një filtër tjetër që është Këshilli i Ministrave.
