Prej të paktën tre muajsh, qindra pajtimtarë të One Albania po përballen me një rritje të çmimit të shërbimeve celulare, edhe pse kontratat e tyre janë firmosur me një tarifë fikse për një ose dy vite.
Në muajin mars 2026, kompania njoftoi se do të indeksonte çmimet e shërbimeve celulare me indeksin mesatar vjetor të çmimeve të konsumit, duke aplikuar një rritje deri në 2.2%, sipas normës së inflacionit mesatar vjetor të publikuar nga INSTAT për vitin 2025.
Por kjo lëvizje ka shkaktuar reagime të forta nga qytetarët, të cilët kanë denoncuar rastet e tyre në media. Ata shprehen se kanë nënshkruar kontrata 12 ose 24-mujore me një çmim të përcaktuar qartë, ndërsa kompania ka vendosur ta ndryshojë atë në mënyrë të njëanshme gjatë kohës që kontrata është ende në fuqi.
Sipas ankesave të mbërritura në redaksinë tonë, kur abonentët kanë kërkuar sqarime, One Albania është përgjigjur se e drejta për të indeksuar çmimet parashikohet në kushtet e kontratës. Megjithatë, qytetarët ngrenë një pyetje të fortë: nëse kompania ka të drejtë të ndryshojë çmimin gjatë kontratës, përse klienti nuk mund të largohet pa penalitet kur nuk është më dakord me kushtet ekonomike?
Ata thonë se, në momentin që kërkojnë të ndërpresin kontratën për shkak të rritjes së tarifës, përballen me detyrimin për të paguar penalitete për prishje të parakohshme të marrëveshjes. Sipas tyre, krijohet një standard i dyfishtë: kompania rezervon të drejtën të ndryshojë çmimin, ndërsa konsumatori mbetet i detyruar të respektojë kontratën ose të paguajë për largimin.
Qytetarët kërkojnë ndërhyrjen e institucioneve përgjegjëse për të verifikuar nëse praktika e ndjekur është në përputhje me legjislacionin për mbrojtjen e konsumatorit dhe me parimin e kontratave të drejta.
