Ministri i Punëve të Brendshme, Besfort Lamallari, u ka bërë thirrje qytetarëve për kujdes maksimal në parandalimin e zjarreve, duke nënvizuar se zjarrvënia përbën një vepër të rëndë penale dhe jo një pakujdesi të thjeshtë. Përmes një reagimi zyrtar në rrjetet sociale, ministri apeloi për përgjegjësi të lartë qytetare për të shmangur katastrofat dhe për të mbrojtur jetën, pronën dhe pasuritë natyrore të vendit.
Në mesazhin e tij, Lamallari rikujtoi se ndryshimet e fundit në Kodin Penal kanë ashpërsuar ndjeshëm sanksionet ligjore për të gjithë ata që shkaktojnë zjarre, ku masat e dënimit gradohen në varësi të rrethanave dhe pasojave të shkaktuara:
5 deri në 8 vite burg për zjarrvënie të qëllimshme gjatë stinës së nxehtë, në kushte që favorizojnë përhapjen e flakëve ose pranë zonave të banuara.
4 deri në 10 vite burg kur zjarri prek zonat e mbrojtura, objektet e trashëgimisë kulturore, objektet e kultit, monumentet apo infrastrukturën kritike.
Deri në 15 vite burg në rrethanat kur nga akti i zjarrvënies shkaktohen pasoja të rënda materiale, rrezikohet jeta e njerëzve ose sillen dëme të pariparueshme ekologjike.
Autoritetet njoftojnë se strukturat e Policisë së Shtetit dhe grupet e emergjencave janë në gatishmëri të plotë në të gjithë territorin për të identifikuar dhe çuar përpara drejtësisë çdo shkelës të ligjit.
