Në 12 mars 2018 PD dhe LSI bënë shumicën në Këshillin Bashkiak Gjirokastër dhe shkarkuan Roland Karalliun, si dhe dy nënkryetarët e këshillit, për t’i zëvendësuar me njerëz të tyre. Një ditë më vonë, kryebashkiakja Zamira Rami, ka firmosur një vërejtje për sekretarin e përgjithshëm të këshillit, Semi Golemi, i zgjedhur në atë post si propozim i PS-së. Motivacioni i vërejtjes është “Moszbatim i orarit zyrtar në punë”. Semi Golemi ishte parashikuar të shkarkohej që në atë mbledhje njësoj si Roland Karalli, por ashtu siç shkuan gjërat, i shpëtoi shkarkimit të paktën edhe për dy javë. Por është i habitshëm fakti se përse Zamira Rami duhet të firmoste një vërejte për Semi Golemin, kur praktikisht ajo s’ka asnjë vlerë, pasi emërimi dhe shkarkimi i tij bëhet me shumicë votash në Këshillin Bashkiak. Ndonëse nuk e shkarkuan në seancën e datës 12 mars, mund ta shkarkojnë në seancën e datës 26 mars. Cfarë vlere ka vërejtja në këtë mes?! Më shumë ngjan si një duf personal i kryebashkiakes. Le më pastaj që kjo e bën edhe qesharake këtë situatë, pasi zor të besosh se pas rreth 3 vjetësh, Zamira Rami zbulon befas që Semi Golemi nuk zbatonte orarin zyrtar të punës. Dhe këtë e zbulon si gjoja rastësisht një ditë pasi PD-LSI bënë shumicën në Këshillin Bashkiak. Nuk është çështja se bëhet qameti po të shkarkohet Semi Golemi, por pse Zamira Rami duhet ‘t’i bjerë nga Kina’ më vërejtje për gjoja çështjen e orarit zyrtar. Është më e ndershme që shkarkimi të kërkohet dhe deklaratohet si vullnet i një shumice të re të krijuar në Këshillin Bashkiak sesa të maskohet me letra bakalli të firmosura nga kryebashkiakja për gjoja ‘moszbatim të orarit zyrtar në punë’.
©ArgjiroLajm.net
