Ahile Deçka, kryetari i Bashkisë Dropull, nuk ishte i vetmi që shkoi në takimin e kryeministrit Edi Rama. Njësoj si ai veproi edhe Zamira Rami, madje qëndroi shumë më afër Ramës në takimin e llogaridhënies publike të qeverisë. Kryebashkiakja e Gjirokastrës, me siguri që është e para kryetare bashkie nga partitë e opozitës që shkon në takimin e llogaridhënies së qeverisë. Prania e saj në podium krah kryeministrit dhe zyrtarëve të tjerë të mazhorancës, shkaktoi jo pak habi. Rrethanat se përse ndodhi kështu janë ende të paqarta, por simbolika e prezencës së saj aty është shumë e fortë.
A mos është duke u përgatitur terreni që Zamira Rami të ‘dezertojë’ nga radhët e LSI-së, në këmbim të rikandidimit në zgjedhjet e vitit 2019 si përfaqësuese e PS-së? Është një pyetje, përgjigjen e së cilës s’e themi dot me siguri në këtë moment, por edhe në këtë rast ka zëra që flasin se Zamira Rami do të bëjë kapërcimin drejt PS-së. Madje, gojët liga në qytet tregojnë se ndërmjetësi i ‘krushqisë’ në këtë rast është vetë presidenti Ilir Meta. Nga ana tjetër, vetë Zamira Rami artikulon gjithnjë e më shumë tezën se ajo ka ardhur në krye të Bashkisë Gjirokastër si pëfaqësuese e shoqërisë civile.
Pra, Rami nuk do të bëhet ‘pis’ me LSI-në apo të identifikohet si përfaqësuese e saj, ndonëse e vërteta është krejt ndryshe, pasi ajo u emërua Prefekte dhe më pas u zgjodh kryebashkiake nën siglën e LSI-së. Megjithatë do të rrjedhin shumë ujëra deri vitin tjetër. Fundja edhe nëse Zamira Rami kalon me PS-në për të rikandiduar, nuk është rasti i parë dhe me siguri as i fundit. Ka për të qenë thjesht një pazar mes saj dhe Ramës, si plot pazare të tjera që na kanë zënë sytë për 20 e kusur vite në Shqipëri.
© ArgjiroLajm.net
