Parlamenti po shkon drejt zgjedhjes së anëtarëve të rinj të Këshillit Mbikqyrës të Bankës së Shqipërisë. Komisioni i Ekonomisë miratoi kandidaturat që do të kalojnë për votim në seancë plenare. Qeveria ka propozuar Suela Popën, ish-drejtore e Agjencisë së Zhvillimit Rural e Bujqësor dhe bashkëshorte e deputetit të LSI-së, Vangjel Tavo; Edlira Luçin dhe ish-ministrin demokrat të Financave, Ridvan Bode. Votimi i emrave të tyre në Kuvend do të bëhet në seancën e ditës së enjte. Surprizë në propozimet e Ramës, nuk ishte vetëm ish-ministri i PD-së, por dhe bashkëshortja e deputetit të LSI-së. Mbetet për t’u parë se si do të votojnë tre deputetët e PS-së në qarkun Gjirokastër; Bledi Çuçi, Mirela Kumbaro dhe Flamur Golemi.
Kujtoni që gjatë fushatës elektorale të vitit 2017, tre kandidatët e PS-së e përqëndruan pothuajse gjithë fushatën e tyre kundër Vangjel Tavos. Ju kujtohen etiketat ‘deputeti celular, ‘deputeti 20-vjeçar’, ‘deputeti call centre’ etj me radhë që Çuçi, Kumbaro e Golemi i bënin Vangjel Tavos?! Ata kanë marrë vota nga qytetarët e qarkut Gjirokastër edhe sepse sulmuan mitin e rremë të Vangjel Tavos, si dhe denoncuan shumë allishverishe të tij me punësimet në administratën publike e jo vetëm. Nëse tre deputetët e PS-së votojnë pro zgjedhjes së bashkëshortes së Vangjel Tavos, praktikisht e gjithë fushata e tyre është rrëzuar dhe në zgjedhjet lokale të qershorit 2019 ata nuk mund të shigjetojnë sërish modelin e tij. Njerëzit kanë memorie!
Së paku vota e atyre të treve duhet të jetë kundër kandidaturës së Suela Popës. Mbase jo për shkak të asaj vetë, por vetëm prej deputetit Tavo, me fushatën kundër të cilit, Çuçi, Kumbaro e Golemi morën vota në Gjirokastër. Megjithatë të presim seancën e së enjtes për të parë se si do të shkojë votimi.
©argjiroja.net
