Në takimin e sotëm të Monika Kryamadhit në Gjirokastër, mbajti një fjalë edhe kreu i kësaj partie në qytetin e gurtë, Krenar Kulla. Ai iu referua Ramës si ‘Kadriu i gjatë’, fjalë që Rama e përdor për të denigruar kryesisht analistët. Sipas Kullës, PS është njësh me krimin, ndërsa LSI-ja është është shpresa.
“Në takimin e parë ne kemi thënë se kur vjedhësi hyn në errësirën e natës fshehurazi në shtëpinë e të zotit, turpi bie mbi të dhe jo mbi të zotin e shtëpisë. Kjo është vërtetuar në kaq pak kohë qeverisje me këtë Kadriun e gjatë. Ata vodhën dhe po vjedhin aktualisht shpresën. Ne ofrojmë të ardhme. Ne kemi thënë në atë kohë; ata janë një me krimin dhe kjo gjë është super e vërtetuar nga nënshtrimi që po i shfaqin këta qeveritarë krimit. Ne jemi bashkë me qytetarët e thjeshtë, të cilët janë të tronditur nga aferat e zbuluara kohët e fundit të lidhjes midis mafias dhe shtetit. Kush mendon se do na rrëzoi, gabohet rëndë. Si mund të intimidohemi ne nga njerëz që si bazë argumenti kanë arrogancën e rrugës. Ne jemi gati të shkojmë në zgjedhje dhe përsëri do të korim fitore, përsëri do të kemi rritje”, u shpreh Krenar Kulla.
Kujtojmë se gjatë qeverisë ‘Rama 1’, Krenar Kulla mbante postin e drejtorit të spitalit ‘Omer Nishani’, ku edhe u denoncua në emisionin ‘Fiks Fare’ për shkarkimin e punonjësve përmes letrës me vrimë. Ndërkohë që u komentua shumë një deklaratë e tij gjatë një interviste televizive, ku Kulla tregonte me krenari rrëfimin e një djali 11-vjecar, i cili ishte i ekzaltuar nga fakti se mbante mend përmendësh numrin e celularit të Vangjel Tavos.
©Argjirolajm.net
