Kriza politike ka vënë në lëvizje ndërkombëtarët, të cilët po kërkojnë që të gjejnë një kompromis mes opozitës dhe socialistëve. Ambasadori i BE-së në Tiranë, Luigi Soreca ka zhvilluar sot pasdite një takim me kryetaren e Lëvizjes Socialiste për Integrim, Monika Kryemadhi. Takimi i zhvilluar në selinë e LSI-së i Soreca-s vjen pas konsultave që zhvilloi një ditë më parë me krerët e partive të tjera aleate të PD-së, si Fatmir Mediu, Agron Duka, Vangjel Dule, Nard Ndoka dhe Dashamir Shehi.
Pas këtij takimi aleatët e PD-së deklaruan se do t’i bënin thirrje presidentit Ilir Meta që të inicionte një tryezë për zgjidhjen e krizës politike. Ndërsa ende nuk ka një ndonjë veprim konkret nga presidenti, pavarësisht se sipas burimeve mësohet se kontaktet janë mbajtur të gjalla.
Presidenti të martën pritet të ketë një takim me partitë e vogla. Më herët LSI-ja mblodhi Komitetin Drejtues për të përcaktuar mbi aksionin politike të opozitës pas protestës së zhvilluar me bllokimin e rrugëve kombëtare në 5 akset kryesore.
Kryemadhi deklaroi se kjo parti, nuk i ngjason më asaj të drejtuar nga Ilir Meta, i cili “kërkonte që t’i zgjidhte problemet “me qetësi dhe dashuri” e donte stabilitet, por është partia e revoltës”.
“Meqenëse ka merak shumë të madh për Lëvizjen Socialiste për Integrim, po ua bëj të qartë që Lëvizja Socialiste për Integrim nuk është më e kohës kur kishte Ilir Metën kryetar partie, që kishte hallin e stabilitetit dhe qetësisë dhe të dashurisë.
Dashuria dhe qetësia me kriminelin ka mbaruar, dashuri dhe qetësi me kriminelin nuk ka, dashuri dhe qetësi me atë njeri që ka veshur me të zeza nënat e shqiptarëve për djemtë e tyre të humbur, për fëmijët e tyre të vrarë në Kolumbi dhe në gjithë Amerikën e Jugut si peng i kontejnerëve të drogës që vijnë në Shqipëri, do të mbarojë. Ia bëj të qartë Edi Ramës dhe të gjithë banditëve të tij, që të kenë kujdes se katër bandat e tij përballë milionave të shqiptarëve janë shumë të vogla.
Por të mos harrojë dhe një gjë, që në çdo shtëpi të shqiptarëve e ka një luftëtar që di të marrë shenjë aty ku është për t’u marrë. Akoma nuk ka filluar ajo që ai mendon se ka filluar. Revolta e shqiptarëve akoma nuk ka filluar”, tha Kryemadhi gjatë fjalës së saj. Ajo ka bërë thirrje që strukturat e partisë të përgatiten për zgjedhje të parakohshme, ku sipas saj, kandidatët për deputetë do të zgjidhen nga strukturat e LSI-së dhe jo nga kryetari i partisë.
