Në Tepelenë s’ka surpriza. Mbledhja e Asamblesë së PS-së nxori vetëm një kandidat për zgjedhjet e 30 qershorit, kryebashkiakun aktual Tërmet Peçi. Fillimisht pati edhe një propozim për Redi Ramën, aktualisht drejtor i Burgut të Bënçës, por më pas ky i fundit u tërhoq duke lënë vetëm Tërmet Peçin.
Kryebashkiaku që qeveris Tepelenën prej 8 vitesh do të kërkojë një mandat të tretë. Edhe sikur të ketë kandidat nga opozita në Tepelenë gjasat janë që të mos ketë surpriza.
Fitorja e Tërmet Peçit është gati çështje e mbyllur. Kryebashkiaku atipik gati gati ka krijuar një hegjemoni në qytetin e Ali Pashës dhe askush nuk guxon t’i dalë përballë. Vetë Peçi thotë në tavolina miqsh se do të jetë në krye të bashkisë dhe i angazhuar me PS-në për aq kohë sa do të jetë edhe Edi Rama. Ky i fundit ka lënë të kuptohet se ka një dobësi për Tërmet Peçin, jo thjesht si individ, por më shumë si model; për të treguar që një njeri i zakonshëm, pa shumë shkollë e grada shkencore mund të jetë një menaxher shumë i mirë për qytetin.
Dhe realisht në drejtimin e Tërmet Peçit, Tepelena ka pasur transformim rrënjësor, investime si rrallë ndonjëherë që kanë krijuar një perspective tjetër për të gjithë zonën.
©argjiroja.net
