Zv.ministrja e Turizmit dhe Mjedisit, Ornela Çuçi, ndodhet këtë fundjavë në Gjirokastër. Ajo ka publikuar disa foto në faqen e saj në Instagram mbi punën e Agjencisë së Zonave të Mbrojtura për kalin e qyqes, shpendin e rrallë që përfaqëson më së miri biodiversitetin e qarkut Gjirokastër.
“Duke monitoruar Kalin e Qyqes, shkabën e fundit folezuese në Shqipëri”, shkruan Çuçi.
Monitorimi u krye nga Çuçi, AKZM dhe ekipi i AOS-Albanian Ornithological Society ne kuader te nje aktiviteti promovues per Kalin e qyqes dhe rendesine e tij si simbol i trashegimise natyrore, kulturore dhe historike te rajonit te Gjirokastres. AOS punon ne keto territore prej disa vitesh.
Administrata Rajonale e Zonave të Mbrojtura Gjirokastër që prej vitit 2016 është angazhuar për ruajtjen dhe rimëkëmbjen e kalit të qyqes në Shqipëri.
Nga 9 prej territoreve të zëna të këtij lloji në Shqipëri, 7 gjenden nën kufijtë administrativë të qarkut Gjirokastër dhe disa territore edhe në kufijtë e zonave të mbrojtura sikurse është rasti i Bredhit të Hotovës dhe ai i Kanioneve të Nivicës.
Në vitin 2016 u ndërtua stacioni i parë i ushqimit suplementar për shkabat, me qëllim sigurimin e ushqimit shtesë dhe uljen e rasteve të mundshme të helmimit. AKZM Gjirokastër, që prej vitit 2016 po kujdeset për mirëmbajtjen dhe furnizimin e këtij stacioni i cili ka filluar tashmë të vizitohet nga kali i qyqes.
Ushqimi plotësues është një masë që po zbatohet në të gjitha vendet e Gadishullit të Ballkanit ku ende folezon kali i qyqes për të ndihmuar rimëkëmbjen e këtij lloji tejet të rrallë që numëron vetëm 51 territore të zëna dhe 45 çifte në të gjithë Ballkanin.
Përdorimi i kësaj mase, përveç se siguron ushqim për këtë lloj, ul edhe rrezikun që i kanoset nga kurthet e helmatisura. Stacioni që njihet ndryshe si “Sofra e Mbretëreshave”, marrë në konsideratë rëndësinë ekologjike të kalit të qyqes, u vizitua për herë të parë në mesditën e datës 2 qershor 2019 dhe vazhdimisht që prej asaj dite ky çift ushqehet aty.
