Deputeti i pavarur, Agron Shehaj, duke folur në parlament sot për investimin e përfolur në ishullin e Sazanit, u shpreh se, ndërsa mediat ndërkombëtare flasin për të, në parlament vazhdon teatri.
“Ky është një plan i mirëfilltë i përdorimit të parave dhe pasurive publike për të mbajtur me dhunë pushtetin politik. Ne kaluam nga pika e vogël që iu dha Gjiknurit dhe resorti i Xhaçkës, tek falja e Sazanit.
Nuk besoj se ka rast me domethënës që tregon qartë se sa i vendosur dhe i paskrupull është kryeministri i Shqipërisë në qëllim e tij kryesor; mbajtjen e pushtetit me çdo mjet.” – u shpreh Agron Shehaj.
Në linjë me përpjekjen e tij për krijimin e një partie të re politike, deputeti e mbylli fjalimin me nota shprese.
“Situata mund të duket e pashpresë dhe ne fakt është shumë e vështirë. Por zgjidhja e vetme është një alternativë e vërtetë dhe e besueshme, që hap ekonominë dhe krijon mundësi për të gjithë. Është një rrugëtim i gjatë, por i mundur.” – përfundoi Agron Shehaj.
