Lideri demokrat Sali Berisha ka dalë pas disa minutash nga Prokuroria e Posaçme, ku mësoi nga prokurorët Arben Kraja dhe Enkeleda Millonai, se është zyrtarisht një person i pandehur për drejtësinë shqiptare. Ai akuzohet për “Korrupsion pasiv” për dosjen “Partizani”.
“Sot jam i pandehur. Ato që kam pasur. Asnjë gjë tjetër përveç 500 faqe mashtrime, mashtrime, mashtrime. Totale”, u shpreh ish-kryeministri dhe lideri demokrat Sali Berisha.
Më tej, duke ju përgjigjur interesit të madh të medias, ai u shpreh se qëllimi i këtij procesi është kapja e Partisë Demokratike sepse ndaj tij nuk ka asnjë provë e dokument, por kjo theksoi Berisha nuk ka për të ndodhur.
“Është zbatimi i një urdhri mafioz politik. Është themelore se nuk ekziston asnjë provë, asnjë fakt, asnjë dokument, nuk ka asnjë firmë të Sali Berishës. I gjithë qëllimi i kësaj është t’i kapim kokën Partisë Demokratike. Por ju garantoj që kjo nuk do të ndodhë”, deklaroi lideri demokrat.
Sali Berisha tregoi se çfarë ju tha dy prokurorëve të SPAK që i komunikuan zyrtarisht akuzën dhe marrjen të pandehur, si dhe çfarë pa në zonën muzeale të Prokurorisë së Posaçme.
“Dy gjëra, deklarova sa vijon: Kjo është një piramidë fund e krye mashtrimi. Kjo ishte deklarata ime. Së dyti, vizitova pjesën muzeale të SKAPIT, në pjesën muzeale të SKAPIT gjendej ora 400 mijë euro, e qëndisur me diamante, e Edi Ramës.
Gjendej fotografia e Amant Josifit, për meritat e tij të spekulimit botëror, gjendej Ymer Lala tek i jepte Dumanit 1 milionë euro për pyetjen që nuk i bëri, gjendej Taulant Balla që po merrte shpërblimin e Suel Çelës, gjendeshin horra që shkojnë nga gjykatësi në gjykatës dhe u bëjnë forma të neveritshme presioni me dokumente antiligjore për t’i mbajtur peng ata.
Gjendeshin 300 milionë euro të sterilizatorëve të Edi Ramës dhe Beqes, gjendeshin 300 milionë euro të Vilma Nushit, që i ndan me Edi Ramën, gjendeshin 4 miliardë euro të Edi Ramës dhe Alabarit. Kjo është shpella e krimit të organizuar në Shqipëri, organizata më e rrezikshme kriminale në Shqipëri dhe Europë”, përmbylli Sali Berisha.
