Policia Kufitare në Kakavijë ka bërë të ditur se është njoftuar zyrtarisht nga autoritetet kufitare greke për një bllokim të përkohshëm të qarkullimit në territorin grek. Sipas informacionit të marrë nga Qendra e Përbashkët e Shkëmbimit të Informacionit në Kakavijë, më 30 nëntor 2025, në intervalin 18:00–22:00 (ora lokale greke), aksi rrugor Kakavijë–Janinë do të jetë i bllokuar për shkak të një proteste të paralajmëruar nga fermerët grekë.
Gjatë kësaj periudhe, qarkullimi do të lejohet vetëm për automjetet me emergjenca shëndetësore, ndërsa të gjithë përdoruesve të tjerë të rrugës u kërkohet të shmangin lëvizjen drejt këtij segmenti në orët e bllokimit.
Policia Kufitare Kakavijë u bën thirrje qytetarëve për mirëkuptim dhe i këshillon të planifikojnë udhëtimet e tyre në orare alternative, në mënyrë që të shmangin vonesat dhe situatat e padëshiruara në kufi.
