Marrëveshja për menaxhimin e Butrinti shkaktoi polemika dhe debate në Akademinë e Shkencave. Akademikët pas miratimit të projektligjit për menaxhimin e parkut kombëtar të Butrintit zhvilluan diskutim akademik me temë “Butrinti – Një vështrim akademik mbi vlerat dhe vlerësimin”, ku nuk munguan debatet. Studiuesi Auron Tare tha se është dorëzuar territori i Burintit, ndërsa kreu i ASH Skënder Gjinushi shmangu përgjegjësinë e institucionit që drejton. Sipas Tares, ky plan menaxhimi është bërë pa asnjë profesor shqiptar.
Organi më i lartë vendimmarrës i fondacionit është bordi, i cili përbëhet nga 5 anëtarë. Por Tare u shpreh se janë “qeveria” e Butrintit. “Ajo që po bëhet sot në Butrint është mohimi i punës që ju keni bërë. Në planin e menaxhimit është bërë nga një grup anglezësh pa asnjë profesor shqiptar. Plani i menaxhimit fillon nga Hodges e këtej. Thelbi është ky, shikoni CV-në e Hodges, që thotë se Fondacioni i Butrintit dhe Hodges kanë themeluar parkun kombëtar të Butrintit. Dhe kjo kur të vdesim ne të gjithë do vazhdojë. Pra të gjitha këto do rishkruhen nga fillimi.
Pra, nuk është çështja se AADF do të bëjë një bar a restorant, por fakti i marrjes nën kontroll të territorit shqiptar. 5 anëtarët e bordit janë “qeveria” e Butrintit”, tha Tare. Profesorë e akademikë u shprehën edhe se nuk janë pyetur, por studiuesi Auron Tare tha se u dorëzua Butrinti. “Lexoni marrëveshjen e Butrintit, ku shkruhet se standardi i gërmimeve do të jetë ai i vendosur në 93-shin. Pra, profesor Luani, nuk ke më standard, nuk jeni më ju! Do të jetë Richard Hodges. Lexoni marrëveshjen, pas miratimit do të shkojnë në kadastër të regjistrojnë pronën në kadastër. Dhe e gjitha kjo të nderuar profesorë jua ndalon Konventa e Parisit e 1972, dhe ju tani i bini vërdallë.. Keni emër profesor pse i lejoni? Sot Giora Solar, i ka çuar letër UNESCO-s, ku i thotë se kjo që po ndodh në Shqipëri s’ka precedent. Dje është dorëzuar territori, ju e dini se Butrinti është histori, do ju ngelet emri në histori që dorëzuat Butrintin”, tha Tare ndër të tjera.
Munguan konsultimet
Akademikët u mblodhën në diskutim për Butrintin një ditë pasi parlamenti e miratoi projektligjin për menaxhimin e një pjese të Parkut Kombëtar nga Fondacioni i Zhvillimit Shqiptaro-Amerikan. Por kreu i ASH Skënder Gjinushi tha se duhej të ishin bërë konsultime dhe me ASH. “Nuk e dinim gjë, sepse i takonte qeverisë të konsultohej me akademinë, të konsultohej me institutet”, tha Gjinushi. Ndërkohë që akademiku Neritan Ceka u shpreh ndër të tjera dhe për miratimin e ligjit, që e quajti vetëvrasje të partive politike në derën e sitit arkeologjik. “E mbështes me bindje të plotë procesin që po zhvillohet për zbatimin e administrimit të Butrintit përmes një fondacioni publik dhe e përshëndes miratimin e ligjit si fundin e sundimit të partive politike në Butrint.
E kam quajtur “vetëvrasje” të partive politike para derës së Butrintit”, tha ai, ndërsa theksoi më tej se Butrinti nuk është pronë e një partie. I pranishëm në debat ishte dhe akademiku dhe arkeologu Apollon Baçe, që u shpreh kundër Hodges, sipas tij vjen dhe bën historinë tonë. “Edhe në faqen e UNESCO-s, ky ka qenë që e ka bërë këtë, bashkë me ish shefin e tij. Pra vjen e të bën historinë e vendit tënd. Përmendet Korfuzi si koloni 260 herë, përmendet Apolonia, Butrinti nuk përmendet vetëm njëherë si qytet kaon, këtu kemi të bëjmë me deformim të shoqërisë”, tha Baçe. Butrinti në 1992 u përfshi në listën e pasurive botërore të UNESCO-s.
