Lajme nga “planeti Alcaraz”, mes videove dhe fotove argëtuese, momente stërvitjeje dhe edhe një “mister” të vogël. Tenisti spanjoll po rikuperohet nga dëmtimi në kyçin e dorës, i pësuar në Barcelonë, që e detyroi të tërhiqet fillimisht nga turnetë “Masters 1000” në Madrid dhe Romë, e më pas nga “Roland Garrosi” dhe “Uimbëlldoni” i ardhshëm.
Së fundmi, në profilin e tij në “Instagram”, fituesi i shtatë turneve Grand Slam publikoi një seri fotosh me titull “një maj pak ndryshe”, ku shfaqej në shumë momente të kësaj periudhe rikuperimi, por jo vetëm, edhe në pushime e çaste relaksi me miqtë dhe familjen. Një Alcaraz që dukej gjithçka përveçse i demoralizuar.
ALKARAZ “MAJTOSH”? – Ajo që tërhoqi më shumë vëmendje ishin dy momente në këtë seri fotosh. Njëri ishte një video ku Alkaraz shfaqet në fushë duke u stërvitur, por duke përdorur dorën e majtë për të mbajtur raketën, në mënyrë që të mos sforcojë kyçin e dëmtuar. Ylli spanjoll ka treguar se ia del mbanë edhe me të majtën, por kjo nuk është diçka e re, pasi ai vetë ka deklaruar më herët se i përdor të dyja duart për të luajtur.
NJË NDËRHYRJE…? – Një tjetër foto ka ngritur më shumë shqetësim te tifozët e tenisit: Alkaraz shfaqet në spital, me mantel dhe me një byzylyk identifikimi në dorë, tipik për pacientët gjatë ekzaminimeve ose qëndrimit në spital. Megjithatë, askush nga stafi i tij nuk ka folur për një ndërhyrje kirurgjikale në kyçin e dorës dhe nuk ka konfirmime për një operacion. Me shumë gjasë, bëhet fjalë për një rezonancë magnetike, ku përdoret pikërisht një veshje e tillë. Spanjolli tashmë ka konfirmuar mungesën në Uimbëlldon, ndërsa bota e tenisit pret rikthimin e tij në sezonin e fushave të forta.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
