Situata e krijuar prej muajit nëntor nga rrëshqitjet e vazhdueshme të dherave në qytetin e Delvinës ka marrë përmasa alarmante. Një banesë është shpallur e pabanueshme, një tjetër ndodhet nën rrezik të drejtpërdrejtë, ndërsa kërcënohet edhe një teqe pranë zonës së prekur.
Ditët e fundit, për shkak të përkeqësimit të motit dhe lëvizjes së vazhdueshme të terrenit, gjendja është rënduar ndjeshëm. Gjatë natës së kaluar, një ngjarje tjetër e rëndë ka tronditur familjen e Ibrahim Shehut: një qeparis rreth 500-vjeçar, i cili ndodhej në kopshtin e teqesë, është shembur mbi çatinë e banesës së tyre, duke shkaktuar dëme serioze materiale.
Fatmirësisht, Ibrahim dhe Minevere Shehu nuk ndodheshin në banesë në momentin e shembjes. Të frikësuar nga rrëshqitjet e dheut, që një ditë më parë ishin bërë kritike, ata kishin vendosur të largoheshin përkohësisht nga shtëpia.
