31-vjeçari nga Ukraina, Andriu Khrustalov, është personi i parë që humbi jetën në aksin Kardhiq-Delvinë, qysh prej kjo rrugë u hap për kalimin e automjeteve si një nyje e rëndësishme që të afronte me Sarandën.
Kamioni me të cilin ai udhëtonte doli nga rruga pak pasi la pas tunelin e Skërficës. Mjeti përfundoi në humnerë dhe shpërtheu në flakë për shkak të lëndës djegëse që po transportonte. Aksidenti tragjik ngre pas shumë pikëpyetje për sigurinë e rrugës, sidomos mbrojtëset anësore apo ato që njihen edhe si guardielat metalike. A janë ato brenda standardeve për një rrugë të tillë?
Argjiroja.net siguron foto të guardielit, që siç mund ta shihni është ndarë në dysh me lehtësi të madhe. Veç kësaj guardielët e kësaj rruge nuk janë të pajisur me kavo çeliku nga prapa dhe janë tejet të vegjël po të kemi parasysh gjeometrinë dhe pjerësinë e rrugës. (Shiko foton më poshtë)
Në kemi bërë një krahasim me guardielët e Bypass-it të Fierit, rrugë e cila nuk ka rrezikshmërinë e aksit Kardhiq-Delvinë. Siç shihet, mbrojtëset metalike janë më të larta, më të trasha dhe të lidhura nga pas me kavo çeliku. (Shiko foton më poshtë)
Rruga Kardhiq-Delvinë ndërkohë, sidomos pjesa pranë tunelit të Skërficës, edhe pse ka një rrezikshmëri shumë më të lartë, mbrojtësët anësore të saj janë jashtë standardit të duhur. Që 31-vjeçari nga Ukraina të mbetet fatkeqi i vetëm që humbi jetën në këtë rrugë e të mos kemi ngjarje të tjera si kjo, do duhet urgjentisht të merren masa për sigurinë e këtij aksi.
Gjatë sezonit veror kjo rrugë ka një fluks të lartë lëvizjesh. Përpara se të jetë vonë duhen nxjerrë mësimet nga kjo ngjarje e rëndë dhe të mbahen përgjegjësitë nëse ka të tilla, si dhe të veprohet menjëherë për të rritur sigurinë e rrugës. ©Argjiroja.net
