Disa ditë më parë ne raportuam se Këshilli Bashkiak Gjirokastër do t’i jepte titullin “Qytetar Nderi” ambasadorit të BE-së në Shqipëri, Luigi Soreca, përmes një ceremonie që do të zhvillohet në kalanë e qytetit të dielën e datës 20 mars.
Por në garë është futur edhe Vlora, e cila sot i ka dhënë Sorecës po të njëjtin titull. Nuk dihet se cilin titull do të tërheqë Soreca të parin, atë të Vlorës apo të Gjirokastrës apo të dyja bashkë. Sidoqoftë kjo garë se kush e nderon të parin kryediplomatin e BE-së që po largohet për një detyrë tjetër është e pazakontë dhe gati në kufijtë e qesharakes.
Mos u çudisni fare që deri në fund të prillit kur Soreca të marrë valixhet dhe të largohet, të kujtohet ndonjë kryebashkiak tjetër për t’i dhënë titullin “Qytetar Nderi”. Kusuri i ambasadorit që me siguri nuk i honeps dot kaq shumë tituj.
Në 2018 Vlora nderoi edhe ish-ambasadoren e BE-së, Romana Vlahutin teksa ajo po përfundonte mandatin e saj. Të paktën të kenë ndryshuar motivacionin! ©argjiroja.net