Dy netë më parë studentët e konvikteve në Universitetin e Gjirokastrës kanë festuar në një prej lokaleve të qytetit me rastin e fundvitit. Eventi ishte organizuar dhe sponsorizuar nga Ndërmarrja e Trajtimit Studentor Gjirokastër. Natyrisht që s’ka asnjë problem pse disa studentë zgjedhin të festojnë, në një kohë kur kolegë të tyre në Tiranë apo gjetkë vazhdojnë protestën. Janë totalisht në lirinë e tyre të protestojnë apo të festojnë. Problemi në këtë rast është në tjetër vend.
Ndërmarrja e Trajtimit Studentor Gjirokastër ka thyer urdhërin e Agjencisë së Prokurimeve Publike në fillim të këtij muaji, që ndalonte shpenzimet për festat e fundvitit. Urdhëri ishte për të gjitha institucionet publike, por nuk është zbatuar nga Doriana Demo, drejtoresha e Ndërmarrjes së Trajtimit Studentor në Gjirokastër. Nga informacionet që ne kemi, rezulton se për këtë event festiv janë shpenzuar rreth 1.5 deri në 2 milionë lekë të vjetra. Nëse fatura është paguar e gjitha privatisht nga drejtoresha Doriana Demo, sigurisht që kjo nuk përbën ndonjë problem.
Por zor se ka në Shqipëri nga ai takëm drejtuesish që nxjerrin para nga xhepat e tyre për të sponsorizuar evente të tilla. Pothuajse të gjithë tentojnë ku e ku të zhvasin para nga buxheti i shtetit. Festa e fundvitit ishte programuar dhe njoftuar më herët nga Drejtoria e Trajtimit Studentor Gjirokastër.
Problemi është se si ky institucion shkeli urdhërin e Agjencisë së Prokurimeve Publike, duke shpenzuar para për festat e fundvitit. Kjo ndërmarrje nga ana tjetër, edhe pse ka kryer restaurim të pjesshëm të konvikteve, shquhet gjithashtu për një nivel shumë të lartë pagash dhe shpërblimesh për anëtarët e bordit. Vetëm rroga e titullarit shkon në rreth 1.3 milion lekë të vjetra.
©argjiroja.net
