Është përkujtuar sot 110 vjetori i Luftës së Mashkullorës (18 mars 1908), një nga betejat më të rëndësishme të çetës së komanduar nga Çerçiz Topulli kundër ushtrive osmane. Kryebashkiakja e Gjirokastrës, Zamira Rami, kreu i Këshillit të Qarkut, Armand Hila dhe familjarë të veteranëve të luftës, bënë homazhe në memorialin e ngritur në fshatin Mashkullorë. Pas vrasjes së komandantit të xhandarmërisë së Gjirokastrës, forca të shumta osmane, të dërguara nga valiu i Janinës për të ndjekur çetën shqiptare, e rrethuan në fshatin Mashkullorë të Gjirokastrës. Aty u zhvillua një betejë e pabarabartë dhe e ashpër. Një grup luftëtarësh të çetës u bënë ballë gjatë një dite të tërë sulmeve të pareshtura të forcave turke dhe mundën ta çanin rrethimin. Nga luftëtarët e çetës mbeti i vrarë Hajredin Tremishti, kurse ushtria turke humbi 20 veta.
