Kryebashkiakja e Gjirokastrës Zamira Rami ka shkarkuar administratorin e njësisë Picar, Krenar Koshi. Zyrtarisht shkarkimi i tij thuhet se është bërë për ‘mosplotësim detyrash nga kontrolli administrativ’. Por nuk përjashtohet mundësia që lëvizja e tij të ketë qenë e motivuar nga fakti se Koshi ka qenë në atë pozicion si përfaqësues i PS-së. Muaj më parë Zamira Rami shkarkoi edhe administratorët e Lazaratit e Cepos; Mexhit Jupi dhe Leonard Mustafaraj, të cilët ishin gjithashtu përfaqësues të PS-së. Sa i përket Picarit, në vend të Krenar Koshit do të emërohet Dritan Tola. Një vit para zgjedhjeve lokale, LSI synon të shfrytëzojë çdo hapësirë pushteti për të punësuar sa më shumë nga radhët e njerëzve të vet. Kjo është një mënyrë për të akumuluar mbështetje dhe gjeneruar vota në favor të saj. LSI do të dalë në zgjedhjet lokale bashkë me PD-në. Ndarja e bashkive nuk është bërë ende, ndonëse piketat e para janë hedhur.
©ArgjiroLajm.net
