Gabriel Guma, kandidati i mbështetur nga opozita për kryetar bashkie në Tepelenë ka nisur fushatën. Fillimisht është zhvilluar një takim prezantues i tij me strukturat e PD-së në Tepelenë. I riu me profesion arkitekt, u shfaq në podium për një moment edhe me fëmijën e tij të vogël.
“Si arkitekt, kam mësuar se çdo projekt i mirë ndërtohet me themel të fortë. Dhe themeli i çdo qyteti është bashkimi i njerëzve të tij. Unë besoj se kjo fushatë nuk është një garë mes nesh. Është një mundësi për ta kthyer Tepelenën në shtëpinë që duam. Dua të rikthejmë besimin se bashkia është e njerëzve, jo e interesave. Dua që të rinjtë të mos largohen, por të kthehen e të ndërtojnë këtu jetën e tyre. Dua që Tepelena të ketë ndriçim, gjelbërim, punë dhe dinjitet. Tepelena ka pasur histori, krenari dhe njerëz të mëdhenj. Tani është koha që t’i japim të ardhme. Me besim, me punë dhe me bashkim ne mund ta ndërtojmë Tepelenën që duam”, shkruan Guma teksa publikon foto nga takimi.
