Një mbledhje maratonë prej pesë orësh e Këshillit të Mandateve dhe Imunitetit ka thelluar përplasjen politike për kërkesën e Strukturës së Posaçme kundër Korrupsionit dhe Krimit të Organizuar (SPAK) për arrestimin e zëvendës kryeministres Belinda Balluku.
Prokuroria deklaroi të hënën se pozita procedurale e saj është “rënduar ndjeshëm” dhe se, nëse provohen akuzat, rrezikon deri në 35 vite burg. Sipas kreut të SPAK, Klodian Braho, nga rreziku fillestar deri në 10 vite burg, situata ka ndryshuar pasi e njëjta vepër dyshohet të jetë kryer 9 herë, me një marzh dënimi që arrin deri në 35 vite me bashkim dënimesh.
Në mbledhjen me dyer të mbyllura, SPAK argumentoi se ka prova të reja dhe se ekziston rrezik i prishjes së provave apo kryerjes së veprave të tjera penale. SPAK konfirmoi se disponon transkripte bisedash dhe prova të tjera të përfshira në materialin hetimor prej 16 mijë faqesh.
Prokuroria theksoi gjithashtu se hetimi “nuk ka sfond politik”, një qëndrim që, sipas tyre, është pranuar edhe nga avokatët e Ballukut, të cilët nuk kanë ngritur pretendime për ndërhyrje politike. Balluku nuk ishte e pranishme në mbledhje dhe u përfaqësua nga avokatët e saj, Pamela Qirko dhe Ardian Kalija.
Mbrojtja kërkoi rrëzimin e kërkesës së SPAK, duke argumentuar se zëvendëskryeministrja ka zbatuar masën e pezullimit nga detyra dhe nuk ka tentuar të largohet nga vendi. Avokatët theksuan se prokuroria duhet të provojë rrezikun konkret për prishje provash apo arratisje, nëse kërkon zëvendësimin e masës me arrest.
PS kundër, PD pro arrestimit
Në përfundim të mbledhjes, palët konfirmuan se do të hartojnë dy raporte të ndara që do t’i kalojnë seancës plenare për votim më 5 mars. Taulant Balla deklaroi se masa e pezullimit nga detyra është e mjaftueshme dhe se pesë anëtarët socialistë janë kundër kërkesës për arrestim, duke theksuar parimin e prezumimit të pafajësisë.
Nga ana tjetër, kreu i grupit parlamentar të Partisë Demokratike, Gazment Bardhi, akuzoi mazhorancën se po bëhet “mburojë politike” për Ballukun dhe kërkoi që deputetët të votojnë pro autorizimit të arrestimit, për t’i hapur rrugë hetimeve të mëtejshme.
Balluku është marrë e pandehur për “shkelje të barazisë së pjesëmarrësve në tenderë apo ankande publike” në çështjen e Tunelit të Llogarasë dhe është nën hetim edhe për 7 lotet e Unazës së Madhe. Vendimi përfundimtar tashmë i takon Kuvendit, i cili më 5 mars do të vendosë nëse do t’i japë apo jo autorizimin SPAK-ut për arrestimin e zëvendës kryeministres./ AP
