Policia e Shtetit ka nisur një hetim për atë që dyshohet se është një fushatë e koordinuar në rrjetet sociale për të dëmtuar reputacionin online të bizneseve turistike në Shqipëri. Drejtori i Përgjithshëm i Policisë së Shtetit, Skënder Hitaj, deklaroi se deri tani janë identifikuar mbi 10 mijë llogari me aktivitet të dyshimtë, të cilat po verifikohen nga strukturat e specializuara.
Sipas Hitajt, këto llogari “dyshohet se kanë publikuar në masë komente dhe vlerësime negative me qëllim krijimin e perceptimit të rremë dhe dëmtimin artificial të reputacionit online të bizneseve shqiptare.”
Ai bëri të ditur se nga analiza paraprake rezulton se “mbi dhjetë mijë llogari në rrjete sociale kanë modele aktiviteti të dyshimtë”, ndërsa sqaroi se një pjesë e tyre janë krijuar rishtazi për këtë qëllim, por ka edhe profile të rregullta që janë identifikuar dhe po hetohen.
“Janë evidentuar raste ku e njëjta llogari ka publikuar, brenda një kohe shumë të shkurtër, vlerësime negative për biznese të ndryshme në Tiranë, Durrës, Vlorë, Sarandë, Elbasan, Shkodër dhe Korçë. Sinkronizimi kohor, ngjashmëria e përmbajtjes dhe mënyra e shpërndarjes së aktivitetit përbëjnë tregues kyç që po analizohen nga grupi hetimor për të përcaktuar nëse kemi të bëjmë me një veprimtari të organizuar”, deklaroi kreu i Policisë.
Sipas Hitajt, nëse provohet se kjo veprimtari ka qenë e qëllimshme, pasojat shkojnë përtej dëmtimit të bizneseve individuale.
“Një aktivitet i tillë, nëse provohet se është i qëllimshëm, nuk cënon vetëm interesat e bizneseve të prekura, por prek edhe konkurrencën e ndershme, besimin e konsumatorëve dhe perceptimin e Shqipërisë si një destinacion turistik i sigurt”, u shpreh ai.
Kryepolici theksoi se Policia e Shtetit do ta trajtojë çështjen me prioritet maksimal dhe ka urdhëruar strukturat e hetimit të krimit kibernetik të intensifikojnë veprimet për identifikimin e autorëve.
“Çdo përpjekje e organizuar për të manipuluar perceptimin publik, për të dëmtuar bizneset tona apo për të cenuar interesin ekonomik të vendit do të trajtohet me prioritet maksimal. Strukturat tona do të vijojnë identifikimin e autorëve, gjurmimin e infrastrukturës teknike të përdorur, analizimin e lidhjeve ndërmjet llogarive dhe sigurimin e provave dixhitale, në bashkëpunim me platformat online dhe partnerët ndërkombëtarë”, deklaroi Hitaj.
