Nga muaji korrik çdo fermer në NIPT, pra i regjistruar në tatime, ka mundësi të aplikojë në bankat e nivelit të dytë për të përfituar kredi më garanci nga shteti.
Shumë e kredisë nuk do të jetë më shumë se 25 milion lekë, ndërsa norma e interesit do të jetë 2%.
Ardita Kuçi, drejtore e Agjencisë së Zhvillimit Bujqësore dhe Rural, gjatë një interviste në emisionin “E-ZONE” në Vizion Plus tha se kjo është hera e parë që shteti del garant me një garanci të tillë për bujqësinë.
“Është hera e pestë që shteti jep një garanci shtetërore për sektorë të ndryshëm, por e para për bujqësinë. Norma e interesit është dakordësuar me bankat dhe do të jetë 2%, më e ulëta e dhënë ndonjëherë. Shteti do të dalë garant për 70% të vlerës së kredisë. Për pjesën e mbetur pra 30% analiza e riskut do të bëhet nga bankat e nivelit të dytë. Në shohim që kërkesa për investim është e lartë dhe kemi pritshmëri që ky instrument do të përthithet nga fermerët dhe individët që duan të investojnë. Interesi më i madh lidhet me investimet në bujtina dhe agroturizëm”, tha Kuçi.
Por kush ka të drejtë të aplikojë dhe çfarë dokumentacioni nevojitet?
“Aplikimin mund ta bëjë kushdo që është i regjistruar pra me NIPT. Mjafton të paraqesë një dokument mbi investimin që kërkon të bëjë, nuk do të kërkohet një plan i mirëfilltë biznesi. Aplikimi i parë do të jetë pranë AZHBR-së. Zyrat tona do të jenë hallka e parë e dorëzimit të këtyre aplikimeve me qëllim për të filtruar dhe saktësuar çdo dosje fermeri, i cili më pas aplikon në bankë. Miratimi i parë do të jepet nga zyrat e AZHBR meqenëse kemi ekspertizën e duhur në këtë drejtim”, sqaroi Kuçi në Vizion Plus.
Po kush janë pesë fushat që do të kenë përparësi në kreditim? Nisin me investimet në serra, agropërpunim, peshkim, akuakulturë, agroturizëm dhe inovacion teologjik.
Prej vitesh bujqësia është sektori që nuk preferohet nga bankat për shkak të riskut të lartë, ndaj qeveria vendosi të ofrojë një garanci sovrane për t’i ardhur në ndihmë sektorit. Ndërkohë në treg pritet të hapë dyert edhe banka shtetërore e investimeve, një bankë që do të ketë në fokus kreditimin e investimeve të mëdha në infrastrukturë, përfshirë edhe bujqësinë.
