Kryetari i Bashkisë Libohovë, Leonard Hide, është paraqitur sot në Prokurorinë e Posaçme Antikorrupsion për një hetim të nisur në vitin 2021 nga Prokuroria e Gjirokastrës, e cila shpalli moskopetencë në 22 janar të këtij viti dhe ia kaloi Gjykatës së Posaçme Antikorrupsion.
Hetimi nuk ka lidhje me detyrën e tij si kryebashkiak, por me kohën ai punonte në Policinë e Shtetit e kur mbante detyrën shefit të Seksionit të Krimeve në Komisariatin e Gjirokastrës.
Prokuroria dyshon se Hide dhe zyrtarë të tjerë në policinë e Gjirokastrës kanë shpërdoruar detyrën në lejimin e kultivimit të kanabisit kundrejt përfitimit të paligjshëm.
Vetë Hide foli për mediat pasi doli nga SPAK dhe tha se është gati që të japë dorëheqjen si drejtuesi i Bashkisë së Libohovës për t’u përballur me drejtësinë.
“Kur kandidova për kryetar bashkie nuk isha në dijeni të hetimit. Nëse është e nevojshme do largohem si kryetar bashkie për t’u përballur me drejtësinë”, u shpreh Hide.
Mësohet se përveç tij, në dosjen që ka marrë në dorëzim SPAK janë marrë të pandehur edhe persona të tjerë; Besnik Lila, Hajdin Musaraj, Edmond Late, Maringlen Dine, Geraldo Nela, të cilët akizohen gjithashtu për shpërdorim detyre.
Pas disa ditësh pritet që Gjykata e Posaçme të marrë vendimin nëse do ta mbajë në shqyrtim këtë dosje apo do ta rikthejë sërish në Prokurorinë e Gjirokastrës.
Leonard Hide mori mandatin si kryebashkiak i Libohovës, nga zgjedhjet lokale të majit të vitit 2023, ku fitoi me 1401 vota përkundrejt kundërshtarit të tij. ©Argjiroja.net