Myqyrem Malaj ishte me detyrë shef operativ në OSHEE-në e Ballshit, deri ditën kur denoncoi vjedhjen e 490 litrave vaj nga drejtori Guri Nuhaj. Malaj shpjegon se vaji përdoret për transformatorët e energjisë, por kur foli për këtë abuzim, u çua fillimisht faturues 50 km larg Ballshit. Pasi njoftoi gjithë hallkat, që nga prokuroria, portali qeveritar e deri te krimi ekonomik, sot është i papunë. Në një bisedë të regjistruar, drejtori i OSHEE Ballsh, Guri Nuhaj tregon mekanizmin sesi duhet të fshihen gjurmët e vjedhjes. Ai thotë se ka miq te Krimi Ekonomik i Fierit dhe po ashtu te portali i qeverisë, ndaj dhe çështja do të mbyllet. Në kamerën e fshehtë të regjistruar nga emisioni ‘Stop’, përmendet edhe një gazetare nga Gjirokastra, e cila punon në një portal, por emri i saj nuk jepet. Më poshtë pjesë nga biseda e përgjuar dhe video e emisionit.
Guri Nuhaj – Fole me ata të Portalit?
Denoncuesi – Fola me atë shoqen mbrëmë.
Guri Nuhaj – Çfarë të tha?
Denoncuesi – Epo do mbash një çikë përgjegjësi ti, mos të turren ty nga mbrapa.
Guri Nuhaj – Po jo… për kokë të djalit! Ore, je mirë ti apo jo? Bile këtë thuaj, po të pyetën. Kam fol me atë dhe më ka thënë ta përgënjeshtroj.
Denoncuesi – Se e kam shoqe unë atë, është një gazetare nga Gjirokastra.
Guri Nuhaj – Kush do të turret?
Denoncuesi – Më tha mua: Mirë ti e mbyll, por mos bëjnë ankesë ata pastaj mbrapa …
