Kryeministri Edi Rama njoftoi se nga dita e nesërme nuk do të lejohen që të përdoren dhe taxitë. Ndërkohë që gjatë konferencës për shtyp, Rama sërish u kërkoi falje të gjithë qytetarëve për masat e marra por u shpreh se kjo ishte e vetmja rrugë për të parandaluar përhapjen e koronavirusit.
“Numri i madh i të shtruarve shkaktoi kolapsin e Lombardisë. Po afron rritja e temperaturave dhe dobëson plotësisht virusin. Duke e marrë lehtë shkon me këmbët e tua drejt një katastrofe kombëtare. Prandaj sot kemi marrë një sërë masash të reja. Duke kërkuar ndjesë për kufizimet e mëdha. Përulësisht iu lutem, por kjo luftë nuk fitohet ndryshe. Nga e premtja deri të dielën do të blindohet qarkullimi. Transporti urban është i mbyllur. Nga e premtja deri të dielën do të mbyllet qarkullimi i mjeteve private. Nuk do të ketë as taxi,”-tha Rama.
Deklarata u bë gjatë një komunikimi me video-mesazh të shefit të qeverisë për masat e COVID-19, në kohën kur bilanci ka arritur në 23 të prekur. Një prej të prekurve, ndërroi jetë dje në Spitalin e Durrësit. Ndërkohë që vatra e të infektuarve është zgjeruar në Tiranë, Rrogozhinë, Elbasan, Durrës, dhe Lushnje. Jeta në vend është paralizuar thuajse totalisht, me ndërprerjen e transportit dhe të punës. E vetmja këshillë e përbashkët e institucioneve është që qytetarët të qendrojnë brenda.
