Mbyllja e kompanive të basteve është një temë e nxehtë që po diskutohet shumë këtyre ditë. Jo vetëm për çfarë do të ndodhë më pas, por edhe për faktin që do të mbeten të papunë mijëra shqiptarë. Prej 1 janari pikat e basteve dhe lojërat e fatit u mbyllën në mbarë vendin.
Nga të dhënat që i referohen një studimi të Universitetit të Tiranës në vitin 2016, rezulton se me mbylljen e basteve nga janari e tutje 7900 vetë do të mbeten të papunë. Sa i përket Gjirokastrës, ArgjiroLajm.net mëson se janë rreth 60 pika bastesh që janë mbyllur, me plus-minus 5 persona të punësuar.
Pra, me një përllogaritje të përafërt rreth 300 vetë sot e tutje janë të papunë. Muaj më parë ministri Arben Ahmetaj tha se nga janari do të ketë “një program rikualifikimi për të gjithë ata që do të dalin të papunë” nga mbyllja e kazinove dhe pikave të basteve. Megjithatë pavarësisht atyre që mbeten të papunë, përfitimet e shqiptarëve nga mbyllja e basteve dhe e kazinove, do të jenë shumë herë më të mëdha.
©Argjirolajm.net
