Gjatë një takimi në Sarandë me operatorë të turizmit dhe drejtues të pushtetit lokal, ministrja e Turizmit dhe Mjedisit, Mirela Kumbaro, tha ndër të tjera se këtë vit nuk do të ketë leje të zakonshme për punonjësit e dikasterit që ajo drejton. Ideja sipas Kumbaros është që të gjithë njerëzit e kësaj ministrie të punojnë për mbarëvajtjen e sezonit turistik.
“Ministria e Turizmit nuk merr leje të zakonshme sivjet, fare. Sepse kur bëjmë analizën e problemeve që kishim vjet, duam që ky vit të jetë jo vetëm më i mirë e të mos kemi probleme që nga rendi e deri te pastërtia, që nga shërbimi e deri te harta turistike”, tha Kumbaro.
Pastërtia e zonave turistike dhe disiplinimi i plazheve, janë prioritete të punës përgatitore për sezonin turistik tha Kumbaro. Ndërkohë që aktualisht kanë nisur aplikimet për marrjen me qira të plazheve në vend. Aplikimet bëhen në #eAlbania ndërsa procesi menaxhohet nga Agjencia Kombëtare e Bregdetit. ©argjiroja.net
